أنا وسهرانة


هو أنت ما بترنش ليه عارفة .. عشان مقفول بس يعنى و أنت لو كنت مفتوح كنت هترن ؟؟!!!
ولو رنيت كانت الرنة هتبقى من حد أنا نفسى اكلمه فعلا ؟؟!!!
طبعا لأ .. أكيد كان هيبقى حد أنا مش عايزاه أنه يتصل أصلا .. ولو على كده بقى يبقى خليك مقفول أحسن

بس .. ماهو أنا سهرانة ومش جايلى نوم ومش طايقة اذاكر .. ومش عايزة اتفرج على التليفزيون يبقى فيها أيه بقى لو ترن
وتكون الرنة من حد أنا عايزة أنه يتصل ونفضل نتكلم مع بعض لغاية ما الشمس تطلع ونفضل مع بعض على التليفون لغاية ما نتقابل
ويا سلام لو ما نتكلمش كلام مهم خالص ويبقى كلامنا لذيذ كده ومش كئيب ومؤدب ومريح .. ما يضطرنيش أنى أفكر الف مرة فى الثانية عشان اعرف ايه المقصود من وراه
أكيد مش أنا الوحيدة فى الدنيا دى الى بحلم بكده والا كانوا ليه اخترعوا مصطلح " المحادثات الهاتفية الليلية " وادوها كل الاهتمام ده
المهم سيبك أنت .. وقولى بجد بجد بجد يعنى .. ممكن أنك تتحدى كل قوانين العقل والمنطق والمفروض والطبيعى وترن دلوقتى رغم أنك مقفول ويحصل بقى كل الى أنا نفسى فيه ده
ولا اروح انام أحسن عشان ده مش ممكن يحصل غير فى الحلم أو بالكتير أوى لو شفته فى الحقيقة يبقى فى فيلم إليزابيث تاون وبس