أديش كان فى ناس



المكان : قهوة على البحر
الساعة : أربعة وكام دقيقة .. يعنى أربعة وشوية كده

قاعدة لوحدى ودى حاجة مش بتحصل كتير
اليوم ناقصة حاجات كتير أوى مع أنه مش ناقصة حاجة خالص
يعنى عادى .. بالعكس المفروض أنه حلو أكتر من العادى
بس مش عارفة ليه بقالى فترة كل ما حس أنى فرحانة أو كل ما يمر عليا يوم حلو أحس أنه فى حاجة ناقصة أو فى حاجة زيادة بس مش حلوة أو حلوة أوى وتفرح أوى أكتر من أى حاجة عرفتها فى حياتى ويمكن عشان كده مش قادرة افهمها أو مش قادرة أصدقها
مش عارفة بجد مش عارفة

امبارح قبل ما أنام كنت حاطة سماعات الإم بى ثرى فى ودنى وبسمع أغنية لما الكون بينام وتقريبا نمت عليها أو ما نمتش عليها برضو مش عارفة بس كل الى أنا عارفاه ومتأكدة منه أنه حسيت أنى نايمة على كتف حد و أنه الحد ده بيملس على شعرى بحنية أوى فحسيت أنى مرتاحة أوى أوى أوى راحة ما بحسهاش إلا و أنا فى حضن ماما
كنت كأنى فوق السحاب
أكيد كان حلم .. بس أنا بجد حسيت به كأنه حقيقة
مش ممكن الخيال يوصل للدرجادى .. لأ ممكن ماهو خيال
بس معقولة يكون خيال .. أصلا مش معقولة غير أنه يكون خيال
مش عارفة بقى
بس
يا ترى مين الحد ده ؟؟؟
يا ترى شكله حلو ولطيف ؟؟؟
يا ترى صوته مميز كده ذى صوت عمر الشريف ؟؟؟
يا ترى هو مريح ذى إيديه ؟؟؟
يا ترى هو حقيقة ولا خيال ؟؟؟


فى القهوة دلوقتى فى ولدين قاعدين فى التربيزة إلى جمبى و معاهم جيتار وكل واحد فيهم بيعزف عليه شوية بس فيهم حد بيعزف أحسن من التانى تقريبا الولد ده هو الى بيعلم الولد التانى
وفى التربيزة الى قدامى فى ولد وبنت قاعدين بيلعبوا شطرنج وولد كل شوية ..........

دلوقتى حالا مرت بنت من الشباك إلى جمبى
البنت دى أنا عرفها أسمها يسرا
كانت معايا فى المدرسة أيام ثانوى
بس كان شعرها أطول من كده بكتير
كنت أنا وهى وبنت تانية إسمها سالى شعرنا كان طويييييييييل أوى
كان بيلفت نظر كل المدرسة
يا ترى قصته ليه ؟
فى حكاية شبه حكايتى الى خلتنى اقص شعرى ؟؟ ولا حكايتها هى مختلفة ؟؟ ولا أصلا مفيش حكاية و الموضوع مش أكتر من تغير ؟؟
ياااااااااااااااااا بقالى أربع سنين ما شفتهاش
أحنا ما كناش صحاب أوى
بس كان فى بينا أيام كتير حلوة
يا ريت تكون مبسوطة وفرحانة هى وكل البنات صحابنا

ممكن تكون فى واحدة فيهم حلمت حلم شبه الى انا حلمت به امبارح كده ولا هما احلامهم مختلفة ولا مابيحلموش اصلا وعايشين الواقع
معرفش ليه دايما الى بيعيش الواقع ما بيحلمش والى بيحلم دايما بعيد عن الواقع حتى لو كان جواه

الولد والبنت الى بيلعبوا شطرنج مشيوا خلاص

والولدين الى بيعزفوا على الجيتار بيعزفوا دلوقتى فيروز" اديش كان فى ناس" بيتهيألى دى الأغنية الوحيدة المناسبة للحالة الى أنا فيها دلوقتى