رجعت الشتوية


صوت الرعد .. نور البرق .. طعم مية الشتا

كل ده بيفكرنى بيك ... بيفكرنى بالأيام الخوالى
عارفة أنك بتضحك كل ما بقولك الأيام الخوالى دى ...و أنا بقيت قاصدة أقولهالك عشان تضحك
وحشنى ضحكنا .. وكلامنا .. وخناقتنا الى بتخلص مجرد ما بتبتدى

وحشنى سهرنا للصبح على التليفون .. وكل واحد فينا يقفل فجأة ومن غير حتى ما يقول باى .. أول ما يحس أنه حد من أهله صحى
وأنا اتغاظ اوى لو انت عملت كده .. واقول لنفسى طب انا بنت طبيعى اخاف انما هو راجل اذاى يخاف
والاقيك بتتصل بعدها بشوية صغيرين .. والاقينى برد عليك وانا فرحانة ومبسوطة انك اتصلت تانى .. وانسى كل غيظى

وحشنى افضل احكيليك عن محمود درويش وزياد الرحبانى وفيروز
وانت تعمل نفسك قال يعنى فاهم انا بقول ايه .. وانك بتحبهم ذيى بالظبط
وانا عارفة انك يمكن تكون ما تعرفهش اساسا .. وانك يادوب تعرف الاغانى المشهورة لفيروز
وانك بتكدب عليا عشان عايز تقرب منى ومن الحاجات الى بحبها .. انا فاهمة ده
بس الحقيقة أنك انت اكتر حاجة انا بحبها .. نفسى أوى تفهم ده

وحشنى أوى أوى أوى انى انسى كل الحاجات الى بتخلينى اكتب الكلام ده على الورق بدل ما اقولهولك
بس ماينفعش .. رغم كل الحاجات الحلوة الى بينا دى والى انا عمالة بفتكرها .. برضو ما ينفعش

الحاجة الوحيدة الى تنفع .. انى افتكرك و توحشنى كل ما الدنيا تشتى

بطاقة تحقيق الشخصية

الأسم :- مش أنا الى اختارته .. ذيى ذى كل الناس يعنى .. وذيه ذى حاجات كتير فى حياتى ماكنش مسموحلى أنى اختارها ... بس الفرق الوحيد أنه من الحاجات القليلة أوى فيا الى أنا بجد بحبها وراضيه عنها

العنوان :- البحر .. وتحديدا" البحر الابيض المتوسط " أصلا أنا جذورى من مكان بيطل على البحر ده .. واتولدت فى مكان تانى غيره بس كان بيطل على البحر ده .. وعشت فى مكان تالت غيرهم خااااااااااالص لكن برضو فى حتة بتطل على البحر ده .. ولأن البحر ده هو الحاجة الوحيدة المشتركة بين التلت أماكن دى بحس أنه بيتى الحقيقى الى ما اتصورش انى اعيش بعيد عنه

المهنة :- بلعب .. اللعب هو الحاجة الوحيدة الى أنا بعرف اعملها بجد

النوع :- بيقولوا بنت .. بس معرفش ليه بحس أنه فى ولد صايع عايش جوايا .. بس بصراحة الرجالة دول عبارة عن مجموعة من العقد الغير قابلة للحل عشان كده لو لم أكن أنثى لوددت أن أكون أنثى

الديانة :- بعبد ربنا .. وبجد مش هعرف أقول أنا بحبه أد أيه .. بحب كل الرسل والأنبياء .. وبحترم كل الديانات

الحالة الإجتماعية :- عيلة .. مش عايزة تكبر .. ورافضة تكبر .. وبتلعن اليوم الى اتمنت فيه أنها تعيش ذى الكبار

البطاقة سارية ... لغاية ما ربنا يعوز بقى