ذى السما


هى أكتر حاجة أنا حبيتها فى حياتى من و أنا صغيرة
حبيتها أوى
أاااااادها
أد ما كانت بتبهرنى
وأد ما كانت بتسحرنى قدرتها على الوجود وعدمه فى نفس اللحظة
على أنها تكون مش بعيدة خالص وسهل تشوفها فى أى وقت أو مكان
وبعيدة أوى أوى أوى و مستحيل تقدر تلمسها

مرات بحس أنها مش بعيدة ولا حاجة هى بس الى بتحب تبان كده عشان تفضل أحلى
أصل من بعيد دايما الصورة بتكون أحلى لأنها مش أوضح
لأنها غموض بيرسم باللبنى خلفية رقيقة أوى لكل الأحداث
أو لأنها بطلة كل الحكايات
مع البحر
والنجوم
والقمر
والشمس
والهوا
و ناس
ناس كتيييييييييير على طول بيبصولها وعينيهم متعلقين أوى بيها
وكل واحد بيتمنى
الى بيكلم ربنا
الى بيطير مع أحلامه
والى بيرسم ملامح الى بيحبهم على السحاب
أسرار كتير بتشيلها لوحدها من غير ما حد يقدر يعرف سرها هى أو حتى يحاول أو يهتم
دايما بيكون الأهم من فهم كلامها هو كلامها نفسه
كلامها المطر الى بيحينا وبيحيى فينا ومعانا الدنيا كلها
و نتوه فى أسرارنا وحكاياتنا وننسى السما
السما الى ذى السما