رجعت الشتوية

أقلب طرفي في السماء لعله ... يطابق طرفي طرفها حين تنظر

أديش كان بيحبها ليقول هيك شعر
أديش مشتاق
كيف كان الحب وكيف صار

حتى كلمات الرحبانين كانت غير
حبهم كان غير
بحس حالى احيانا جاية من عالم تانى
روحى لسة علقانة بهداك الزمان
زمن الحب الحقيقى المجنون الرومنسى الأبدى

كنت دائما أحلم بشاب رومنسى .. نمشى ساعات تحت المطر .. نقعد جمب الصوبيا نحكى عن أحلامنا عن بيتنا الصغير يالى بيطل عالشام .. عن الشعر .. يقلى شعر .. يكتبلى شعر و أقدر أقراله يالى بكتبه من دون ما خاف أنه ما يفهمنى
ينطرنى تحت الشباك ليشوفنى بس لمحة قبل ما ينام
يحطلى كل يوم وردة عند الباب
يحب فيروز وزياد و أم كلتوم ووردة
مايخاف من حبه قدام الناس
يخطفنى بليلة مطر ياخدنى مشوار لبعيد ما يشوفنا حدا
يحبنى متل ما كانوا يحبوا
متل ما بحب انى حب

استنيت كتير وما اجى
بس أنا بعرف أنه بمكان ما من العالم هو موجود
نصى التانى يالى بيكملنى
عم يعيش حياته هلأ يمكن مع حدا تانى
يمكن ب بلد تانى
بس حاسس متل ما أنا حاسة هلأ
بردانة .. خايفة .. عم بستنى لأخر يوم بحياتى
هو موجود أنا متأكدة
بس ما بعرف وينه
ويمكن ما نلتقى بهالحياة
يمكن بحياة تانية

يمكن
ما بعرف